18.01.2015

సుట్టపు సూపుకు పోయిన సూసొద్దామని పోయిన

పెళ్ళిళ్ళకని పోయిన పేరంటాలకు పోయిన

బతకలేక పోయిన బతుకుదెరువుకు పోయిన

అవ్వగారింటికి పోయిన అత్తగారింటికి పోయిన

పని మీద పోయిన పని లేక పోయిన

దూరమెక్కువున్న ధర తక్కువయ్యే

ధూమశకటమే పేదల దివ్య రథము

ఉరికురికి బస్సుపట్టి ఊగుకుంట ఒచ్చెటోళ్ళు 

ఉస్కెపోస్తె రాలని బస్సుల ఊపిరాడకొచ్చెటోళ్ళు

రైలు స్టేషనుసేరి, వేళకురాని బండి కొరకు ఎదిరెదిరి సూస్తుంటరు

రైలు కూత విన్పడగనె సామాన్లు ఎత్తుకొని తికమక తిరిగేస్తుంటరు

తట్టబుట్ట నెత్తినెట్టి పిల్లపాప సంకనేసి ఉరుకురికి

పట్టుబట్టి కిక్కిరిసిన బోగినెక్కి చిరుహాసము చిందిస్తరు

దూరమెక్కువున్న ధర తక్కువయ్యే

ధూమశకటమే పేదల దివ్య రథము

ఒంటి కాలి జపము చేస్తు సంటి పాప బరువు మోస్తు

స్టేషనొస్తె సూస్తుంటరు సక్కగ నిల్సుందమని

సందు సేసి సిన్న పిల్లల సంక దించి సర్దుకొని

సామానును సర్దేస్తరు సందు సూసి కూసుంటరు

స్టేషనొస్తె సూస్తుంటరు సీట్ల కూసుందమని

సీట్ల జాగ దొర్కబట్టి పాట్లు పడి ఇకిలిస్తరు

సిన్న కునుకు తీసి ఎన్నో ఊర్లు దాటి

దూరమెక్కువున్న ధర తక్కువయ్యే

రైలు బండి దిగి ఆలు మగలు పిల్ల జెల్ల గూడి

చేరుకుంటరు ఊరుకు కోరుకున్న చోటుకు..

దూరమెక్కువున్న ధర తక్కువయ్యే

ధూమశకటమే పేదల దివ్య రథము

                             >డి.ఆర్.మూర్తి(18.01.2015)            .92)